قالت لي السومرية وقلت لها ... حوار بين قلبين ...

قالت ...
حياتي عكب شخصك شلي بيها
وجميع اعضاي صار الشلل بيها
توديلي رسايل شلي بيها
أريدن شوفتك ونكعد سويها ...

قلت ...
حبيبة الفكر بيج مشغول
والكلب من فركتج معلول
والناس اشكال عليه تكول
امشي نهاري بلا هدف مخبول
سهران ليلي وليل اليحب يطول
ونار العشك برويحتي تصول وتجول ....

قالت ...
يل ردت عني تروح روح بسلامة
بس عندي راح يصير يوم القيامة ...

قلت ...
حبيبه شلون اروح بعيد عنج وانتي
بوسط الكلب والروح كعدتي وسكنتي
وآني اللي باسمج الهج وجنج ما سمعتي
ولا قريتي بالاخبار شوكي ومحنتي...

قالت ...
سفن شوكي مشت ببحور ونهار
ونفد حتى صبرها الروح ونهار
يحن كلبي لشوفتك ليل ونهار
اشوفك وين واحجيلك البيه ...

قلت ...
حبيبه منين انجيب الصبر سويلي جاره
الروح تحتضر ومن فركتج محتاره
شجاني وبهلعمر حبيت وبحور العشك غداره ...

قالت ...
انا المسموم بفراكك بلا سم
وادور للجرح ماكو بلاسم
نسيت اسمي وعشت بعدك بلا اسم
وبدونك صرت مجهول الهوية ...

قلت ...
حبيبه انت اسمج بلفكر منقوش دوم
ولا عشت لو غاب اسمج علي يوم
سهران ومن شوكي هجرني النوم
اريد اغفي بلكي يمر طيفج عليه ...

قالت  .. بعد فترة انقطاع ...
عليك الله الوكت نساك لو عمدا نسيتونا
على فراكك تمر ايام ولا مره ذكرتونا...

قلت ...
والله ما نسيناكم واشلون انساكم
وآني اللي تركت الكلب والروح وياكم
بس غبتي وكلت يمكن هلزمن لهاكم ...

قالت ...
لاتزعل وتحتار لو غبنا عنك
كل الأدلة تكول ماكو أغلى منك...

قلت ...
شلون ازعل واحتار يلشدة ورد وازهار
وليش اسهر واحتار وانت بلكلب ليل ونهار
بس والله معذبني بعدج والكلب شعلة نار ...

وقلت لها كذلك ..
وهل يمكن ان ازعل من انسان سكن القلب وبه حل  
فؤادي وفكري ووجداني في ذكرك دائما منشغل
اسالي قلبك سومريتي هل هذا شيء يعقل
تقبلي تحيات قلبي الذي من شوقه اليك معتل

قالت ...
مسويلي حبك سحر وصايرلي حبك نهج
وحروف اسمك صفت ممزوجة بالدم مزج
لو عنك اكب شعر من نفسي والله انحرج
ولها السبب يا حلو حاير شدزلك مسج ...

قلت ...
سره ضعن الفراك ابليل وحداي
اوحكمني الحزن بلصفنات وحداي
عكب عينك تره ظليت وحداي
امغيم والدمع يمطر عليه ..

قالت ...
يا اجمل محطة البيها الكلب يرتاح
يا نهر الحنان وبالكلب يجري
وتسألني احبك اي والله احبك
بس ليش احبك بهاي ما ادري ...

قلت ... أذكرها بأوقات الإستراحة أيام العمل عندما كانت تحضر الشاي  لنشرب سوية ...
حبيبة يا أحلى صدفة بهلعمر وانتي
وبفركتج زادت همومي وعلت ونتي
          اتمنى من ايدج اشرب انا  ون تي ( يعني شاي واحد )
وبيدج انتي تخوطيه اليه ...

قالت ...
ردت ادزلك كلمة احبك خفت ما تكفي الحروف
راح ادزلك نظر عيني حتى غيرك ما تشوف ...

قلت ...
تسلم عيونك يا ام الروح النقية
يلكلج رقة او وفه يا حبيبة وحنيه
عيوني من يوم الشافتج يلغالية الأبيه
ما شافت ولا حلى عندها بس السومريه
والله مشتاق واخاف احجي شجرالي واللي بيه...

قالت : وكنت في البحرين ازور ولدي ...
فرق سفر البحرين بين قلبين كبيرين
لقيانا عند دجلة والفراتين
بعودتكم لنا سالمين ..

قلت :
لا يمكن للمسافات مهما تباعدت
ان تفرق بين قلبين على الوفاء تعاهدت
اميرتي اميرة سومر واميرة اكد
ان كنت في البحرين فهذا الجسد
والفكر والوجدان في بغداد واشهد
عندك يا من ملكت الفؤاد والكبد
مشتاق بحق من له كل من صام وسجد..

قالت ...
يلرحت عني بعيد وسكنت المنامة
صدكني من فركاك ليلي ما نامه
وما حصلت من ربعي بس الملامه
ترد روحي اليه من ترجعلي بسلامه...

قلت ...
حبيبه وحك عيناج مليت المنامة
وبفركتج وحبابي بيها الليل ما نامه
والجنة بلا السومريه ما بيها غنامه
وما هي جنتي ويشهد الله عليه ..

وقلت لها كذلك ..
سافرت والله من غصبن عليه
ويمج تركت الروح مو بيديه
مشغول الفكر وبكلبي حريحيه
وما يطفيها بس شوفة السومريه
اغمض الكلب والعين من حلوة تمر بيه
يلشوفتج عيد وسوالفج تغريد وفرح ويهليه..

قالت ..
اقسم بالخلق ايوب عن حبك ابد ما اتوب
مهما تبتعد وتغيب حبك بالكلب مكتوب ..

قلت ..
اقسم بالله رافع السماوات بلا عمد
وباسط الأرض وجاعل جبالها وتد
حبيبة انت ويضل حبج بكلبي للأبد
يا رمز الوفاء يا بنت سومر وأكد
يارب اجعل حياتها سعادة ورغد ..


قالت ..
دليلي بليل هج مني وشردلك
والك مديون كل عمري شردلك
شكتب شوديلك يا روحي شردلك
عجز مني القلم القلم وطاح من اديه ..

قلت ..
حبيبة حرت شكتبلج شكلج والج شهدي
يللي انت فرحتي والسعد يا ناس شهدي
وانت حلاوة هلعمر والعسل انت وشهدي
اهديلج هلعمر بس لا تكطعين بيه ...

قالت ...
أحبك فامنحني العذر إن قصرت في وصلك
وإن طالت بي الأيام لم اسمع بها صوتك
وإن بعدت خطاي اليوم عن دربك
ثق يا أروع الأحباب أن القلب في ذكرك
وإن الروح ما زالت تحبك ...

قلت ...
ان القلوب سواقي سر اشتيافقك واشتياقي
احن اليك بعيد لحظات من نهاية التلاقي
لا تعجبي وتستغربي واسألي قلبك الخفلقِ
يا رمز الوفاء مكانك عندي في الاحداقِ
لا الشعر ولا البيان يمكنه وصف اشتياقي

قالت ..
ما ادري شلون اجاري الشاعر
واجاوب شلون وانت كتلة مشاعر
واتعجب شلون ترد وما تكسر الخاطر ..

قلت ..
حبيبة ليش العجب وانت مصدر الآلهام
ليلتج سعادة ويومج هناء واجمل الاحلام
وكليبي بشوفتج يهدى ويبره من الآلام..

قالت ..
ماذا عساي اجيب وانا اقف امام بحر متدفق من الشعر الرائع..

قلت ..
وماذا عساي ان اقول وانت مصدر الالهام
حديثك النجوى وهديل الحمام
وقربك يطفئ ما في القلب من ضرام
تقبلي جزاك الله خيرا تحيات قلبي المستهام ..

صباح الجميلي