هل علينا اليوم يا احبابي السبت
ومروا الغالين على الفكر واتذكرت
اتذكرت ! وشوكت آني نسيتكم حتى اليوم افتكرت
اتذكرت شكد كتبتيلي شعر وشكثر الج آني كتبت
واشكد شكيتي لي حالتك وشكثر كعدت يمج وسمعت
وعاهدتج على الوفا وتدرين عمري للعهد ما خنت
وكلتلج ما لي طمع وياج وكل شي منج والله ما ردت
شكيتي لي محرومة حنان وشكيتي لي قسوة الخلان
وشكيتي لي اهمال الأهل وشكيتي لي غدر الزمان
ورديت يا حبيبة الصبر ولا تيأسي من رحمة الرحمن
ان جان فقدت الأب والأخت والأخ والأم بحر الحنان
تعالي آني على العهد اتبناج والله وانسي الكان وما كان
منيتي اشوفج مسعدة وبعيوني اخدمج من شر هلوكت
بس مالج نصيب وانكطعت اخبارج وليش؟ آني ما عرفت
وانتظرت ممكن رسالة منج تجيني واشكد آني اتمرمرت
ومرت الآيام وكم سبت مر من بعد ذاك السبت وتعذبت
لا خبر منج اجاني ولا رسالة منج تكلي يا حبيبة شوكت
والناس تدرين تموت مرة بالعمروآني من كثر مر الصبر
ومن كثر شوكي ولوعتي والله باليوم ميت موته متت
روحي يا حبيبة بسلامة ولله صدكي آني اتضرعت
يوفقج ويسعدج ويشهد الله وزين تدرين وياج ما قصرت
وباقي على الوفا اللي نسيتيه وانت اللي خسرتي واني ما خسرت
صباح الجميلي