خبريني
حبيبه اسألج خبريني ... يلورده بعطر تنشيني
بمته الحلو يلاكيني ... وشوكي بجمر كاويني
بنار العشك
***
وجهج مثل دورة كمر ... كل حاجب العندج وتر
بلحظة وهي لمح البصر ... بجبدي نبل ترميني
بسهام العشك
***
نومي تره جافاني ... صدكي السهر عناني
وحبج جلد خلاني ... فوك العظم يا عيني
هدني العشك
***
يسميره يا بنت الحلال ... ما ضل صبر يكفي الدلال
ورويحتي بداءٍ عضال ... وانت الدوه اليشفيني
من داء العشك
***
يسميره ملينا الصبر ... وشنهو البقى بهذا العمر
أيوب مثلي ما صبر ... لو يرجع يحييني
على صبر العشك
***
صباح الجميلي